ނ. އަތޮޅު ޤުރުއާން މުބާރާތް 2025 ވެލިދޫގައި ފާހަގަކޮށްލެވޭ ދަރިވަރުންގެ ބައިވެރިވުމާއެކު ނިމުމަކަށް

ނ. އަތޮޅު ކައުންސިލުން އިންތިޒާމުކޮށްގެން ނ. ވެލިދޫގައި ބޭއްވި "ނ. އަތޮޅު ގުރުއާން ފެސްޓިވަލް 2025" ތިން ދުވަހުގެ ފޯރިގަދަ މުބާރާތްތަކަކަށްފަހު އޮގަސްޓް 23 ވާ ހޮނިހިރު ދުވަހު ނިމިއްޖެއެވެ. އޮގަސްޓް 21 އިން 23 އަށް ކުރިއަށްދިޔަ މި ފެސްޓިވަލަކީ މުޅި އަތޮޅުގެ ދަރިވަރުންގެ މެދުގައި ގުރުއާން އުނގެނުމާއި ކިޔެވުމުގެ ރޫހު އާލާކުރުމަށް ބޭއްވުނު ހަރަކާތެކެވެ.

ކުރިން "އަތޮޅު ގުރުއާން މުބާރާތް" ގެ ނަމުގައި ބާއްވަމުން އައި މި ހަރަކާތް، "ނ. އަތޮޅު ގުރުއާން ފެސްޓިވަލް" ގެ ނަމަށް ރީބްރޭންޑް ކުރީ މިދިޔަ އަހަރުއެވެ. މިއީ މި ނަމުގައި މި ފެސްޓިވަލް ބޭއްވި ދެވަނަ ފަހަރެވެ. މި ފެސްޓިވަލްގެ މައިގަނޑު މަގްސަދުތަކުގެ ތެރޭގައި ދަރިވަރުންގެ ހިތްތަކުގައި ކީރިތި ގުރުއާނަށް ލޯބި ޖެއްސުމާއި، ތަޖުވީދުގެ މަގުން ގުރުއާން ކިޔެވުމާއި ހިތުދަސްކުރުމަށް ހިތްވަރު ދިނުމާއި، ގުރުއާން އުނގަންނައިދިނުން ކުރިއެރުވުމުގެ އިތުރުން ބައިނަލްއަގުވާމީ ފެންވަރުގައި ރާއްޖެ ތަމްސީލުކުރެވޭނެ ފަދަ ގާރީންނާއި ހާފިޒުން އުފެއްދުން ހިމެނެއެވެ.

މިއަހަރުގެ ފެސްޓިވަލްގައި ނ. އަތޮޅުގެ ހުރިހާ ސކޫލަކުން ޖުމްލަ 181 ދަރިވަރުން ބައިވެރިވެފައިވެއެވެ. މުބާރާތް ކުރިއަށްދިޔައީ ދެ ގޮފި ބަހާލައިގެންނެވެ. އެއީ ބަލައިގެން ކިޔެވުމުގެ ގޮފި (107 ބައިވެރިން) އަދި ނުބަލައި ކިޔެވުމުގެ ގޮފި (74 ބައިވެރިން) އެވެ. މި ހަރަކާތް ކުރިއަށް ގެންގޮސްފައިވަނީ "ނ. އަތޮޅު ގުރުއާން ފެސްޓިވަލްގެ ގަވާއިދު 2025" އާ އެއްގޮތްވާ ގޮތުގެ މަތިންނެވެ.

މުބާރާތުގެ ހުރިހާ ބައިވެރިންނަށް އަތޮޅު ކައުންސިލްގެ ފަރާތުން ބައިވެރިވިކަމުގެ ސެޓްފިކެޓް ދީފައިވެއެވެ. ކޮންމެ ކީ-ސްޓޭޖަކުން އެންމެ މޮޅު ތިން ދަރިވަރުންނަށް ޓްރޮފީއާއި، ސެޓްފިކެޓް އަދި އިނާމު ދީފައިވާއިރު، ދެ ގޮފިން މުޅި މުބާރާތުން އެއްވަނަ ހޯދި ދަރިވަރުންނަށް ހާއްސަ ފައިސާގެ އިނާމު ދީފައިވެއެވެ.

ވަނަވަނައަށް އައި ދަރިވަރުން

• ބަލައިގެން ކިޔެވުމުގެ ގޮފި (ކީ-ސްޓޭޖް 4):
  1 ވަނަ: ޝާއިމް ބިން އައްބާސް (މޭނާ ސކޫލް) – 10,000 ރުފިޔާ
  2 ވަނަ: އަރުޝަމް ރަޝީދު (ހެނބަދޫ ސކޫލް) – 5,000 ރުފިޔާ
  3 ވަނަ: އައިޝަތު ޔޫލީ ޝާއިރު (މޭނާ ސކޫލް، ކީ-ސްޓޭޖް 2) – 3,000 ރުފިޔާ

  • ނުބަލައި ކިޔެވުމުގެ ގޮފި (ކީ-ސްޓޭޖް 3):
    1 ވަނަ: އައިޝަތު އާނުމް އަހުޝަމް (ނ. އަތޮޅު ތައުލީމީ މަރުކަޒު) – 10,000 ރުފިޔާ
    2 ވަނަ: އަމްރާ ބިންތި އަބްދުﷲ އާމިރު (މާފަރު ސކޫލް) – 5,000 ރުފިޔާ
    3 ވަނަ: ސާރާ ބިންތި އަހުމަދު ލިސާމް (ކެނދިކުޅުދޫ ސކޫލް، ކީ-ސްޓޭޖް 2) – 3,000 ރުފިޔާ

  މުބާރާތުގައި ބައިވެރިވި 13 ސކޫލްގެ ތެރެއިން، ސކޫލްތަކުގެ ރޭންކިންއަށް ބަލާއިރު މުޅި މުބާރާތުން އެއްވަނަ ސކޫލަކަށް ހޮވުނީ ހެނބަދޫ ސކޫލް އެވެ. ދެވަނަ މާފަރު ސކޫލް ހޯދިއިރު، ތިންވަނަ ހޯދީ ހޮޅުދޫ މޭނާ ސކޫލް އެވެ.

  ,

  ނ. އަތޮޅު ތަޢުލީމީ މަރުކަޒުގެ ރިހި މާލަމުގައި ބޭއްވުނު ނިންމުމުގެ ރަސްމިއްޔާތުގައި އިސްލާމިކް މިނިސްޓްރީގެ ސްޓޭޓް މިނިސްޓަރ އޮނަރަބަލް ޢަބްދުﷲ ސައުދާން ޝަރަފުވެރިކޮށްދެއްވިއެވެ. މި ރަސްމިއްޔާތުގައި ދަރިވަރުންނާއި، މުދައްރިސުންނާއި، ބެލެނިވެރިންނާއި، ރަށު ކައުންސިލްގެ އިސްވެރިންނާއި އަދި މުޖުތަމަޢުގެ ފަރާތުން ބައިވެރިވެ ވަޑައިގެން، ޤުރުއާން ތަޢުލީމާއި އިސްލާމީ އަގުތަކަށް މުޖުތަމަޢުން ދޭ އަހައްމިއްޔަތުކަން ހާމަކޮށްދެއްވިއެވެ.