ލާމަރުކަޒީ ޤާނޫނަށް ސަރުކާރުން ހުށަހަޅާފައިވާ އިސްލާހުތައް އަނބުރާ ގެންދިއުމަށް ކައުންސިލުން ގޮވާލައިފި

ލާމަރުކަޒީ ޤާނޫނަށް ސަރުކާރުން ހުށަހަޅާފައިވާ އިޞްލާޙުތަކުގެ ސަބަބުން، ކައުންސިލްތަކުން ރައްޔިތުންނަށް ފޯރުކޮށްދޭ ޚިދުމަތްތަކުގެ މެދުނުކެނޑި ކުރިއަށްދިއުމަށާއި ޚިދުމަތުގެ ފެންވަރަށް ނޭދެވޭ އަސަރުކުރާނެތީ، އެ އިޞްލާޙުތައް އަނބުރާ ގެންދިއުމަށް މި ކައުންސިލުން ގޮވާލަމެވެ.

28 ޖުލައި 2025 ގައި ރައްޔިތުންގެ މަޖިލީހަށް ހުށަހަޅާފައިވާ އަދި މިހާރު މަޖިލީހުގެ ލާމަރުކަޒީ ކޮމިޓީން ދިރާސާކުރަމުންދާ ބިލް ނަންބަރު B-18/20/2025 އަކީ، ލާމަރުކަޒީ ޤާނޫނުގެ ދަށުން ކައުންސިލްތަކުން މިހާރު ރައްޔިތުންނަށް ފޯރުކޮށްދެމުންދާ ޚިދުމަތްތަކަށް ބޮޑެތި ހުރަސްތަކެއް ކުރިމަތިވެދާނެ ބިލެކެވެ. މި ބިލު ފާސްވެ ތަޞްދީޤުވެއްޖެނަމަ، އަންނަނިވި ނަތީޖާތައް ނުކުންނާނެއެވެ:

• ލޯކަލް އޮތޯރިޓީ ކުންފުނިތަކަށް 10 މިލިއަން ރުފިޔާއަށްވުރެ އަގުބޮޑު މަޝްރޫޢުތައް ހިންގުން މަނާކުރުމަކީ، ރަށާއި، އަތޮޅާއި، ސިޓީ ފެންވަރުގައި ރައްޔިތުންގެ ރައުސްމާލު އިތުރުކުރުމަށާއި ޚިދުމަތް ދިނުމަށް ކައުންސިލްތަކުގެ ކުންފުނިތަކުން މިހާރު ހިންގަމުންދާ ހުރިހާ މަސައްކަތްތަކެއް ހުއްޓުމަކަށް އަންނާނެ ކަމެކެވެ. ކައުންސިލްތަކުގެ މާލީ ޙާލަތު މިހާރު ހުރި ގޮތުން، ލޯކަލް އޮތޯރިޓީ ކުންފުނިތަކުގެ މަޝްރޫޢުތައް 10 މިލިއަން ރުފިޔާއަށްވުރެ އިތުރުވުމަކީ އާންމު ކަމެއް ނޫނެވެ.

  • ކުލި ދެއްކުމަކާ ނުލައި ސަރުކާރަށް އާންމު ބިންތައް ބޭނުންކުރެވޭ ގޮތަށް އޮތް މާއްދާގެ ސަބަބުން، ކައުންސިލްތަކަށް އާމްދަނީ ހޯދުމަށް އޮތް ފުރުޞަތު ހަނިވެ، ރަށުގެ ރައްޔިތުންގެ ބައިވެރިވުމެއް ނެތި ސަރުކާރުން ބިންތައް ދޫކުރުމުގެ ބާރު ލިބިގެންދެއެވެ.

  • ކައުންސިލްތަކަށް މުވައްޒަފުން ނެގުމުގެ 365 ދުވަސް ކުރިން ނޯޓިސް ދޭންޖެހުމާއި، ރައްޔިތުންގެ މަންފާއަށް ޤުދުރަތީ ވަސީލަތްތައް ބޭނުންކުރުން ހަނިކުރުމުގެ ސަބަބުން، ރައްޔިތުންގެ ބައިވެރިވުމާއެކު އެކުލަވާލާފައިވާ ތަރައްޤީގެ ޕްލޭންތައް ތަންފީޛުކުރުމަށް ހުރަސްއެޅި، ޤާނޫނީ ޒިންމާ އަދާކުރުމަށް ކައުންސިލްތަކަށް ނުކުޅެދޭނެއެވެ.

  އިންތިޚާބުތަކާ ދިމާކޮށް އިންތިޚާބީ މަޤާމުތަކުގައި ތިއްބަވާ ބޭފުޅުން ނުފޫޒު ފޯރުވުން ހުއްޓުވުމަށް ބައެއް ޤައުމުތަކުގައި ދައުލަތުގެ ވަސީލަތްތައް ބޭނުންކުރުން ހަނިކުރި ނަމަވެސް، މި ބިލުގައި ހުށަހަޅާފައިވާ ހުރަސްތަކަކީ އާދަޔާޚިލާފަށް ދިގު މުއްދަތަކަށް އަދި ހަމައެކަނި ކައުންސިލްތަކުގެ ޚިދުމަތްތަކަށް އަމާޒުކޮށްފައިވާ ހުރަސްތަކެކެވެ. މަރުކަޒީ ސަރުކާރަށް މިފަދަ ހުރަސްތަކެއް ނެތް ޙާލަތެއްގައި، މިއީ ސަރުކާރުގެ މާލީ ބާރާއި އިދާރީ ނުފޫޒު ބޭނުންކޮށްގެން އިންތިޚާބަށް ނުފޫޒު ފޯރުވުމަށް މަގުފަހިވާނެ ކަމެކެވެ.

  މި ބިލު މިހާރު އޮތް ގޮތުން، ރައްޔިތުންނަށް ދޭންޖެހޭ ޚިދުމަތްތަކަށް ހުރަސްއެޅި، ރައްޔިތުންގެ ބައިވެރިވުމާއެކު ހަދާފައިވާ ތަރައްޤީގެ ޕްލޭންތައް ހުއްޓި، ރަށާއި އަތޮޅާއި ސިޓީގެ ވަސީލަތްތައް ރައްޔިތުންގެ މަންފާއަށް ބޭނުންކުރުން ހަނިވެގެންދާނެއެވެ. އަދި ދައުލަތުގެ ފައިސާ ބޭނުންކޮށްގެން ކައުންސިލް އިންތިޚާބުތަކަށް ސަރުކާރުން ނުފޫޒު ފޯރުވުމަށް ފުރުޞަތު ލިބި، އިންތިޚާބުގެ މިނިވަންކަން ގެއްލިގެންދާނެއެވެ.

  ވީމާ، މި ބިލު އަނބުރާ ގެންދިއުމަށް ސަރުކާރަށް ގޮވާލަމެވެ.