ގުދުރަތީ ވަސީލަތްތައް ހިމާޔަތްކޮށް، ދިރިއުޅުން ދެމެހެއްޓުން: ސީއޯޕީ16 މޭޔަރުންގެ ފޯރަމްގައި ދެމެހެއްޓެނިވި ނޫން ފަތުރުވެރިކަމާ ދެކޮޅަށް

ކޮޕް16 ގެ މޭޔަރުންގެ ފޯރަމްގައި، އަޅުގަނޑުމެންގެ ރައީސް މުޙައްމަދު ބަޝީރު ދެއްވި ތަޤުރީރުގައި، ދިވެހިރާއްޖޭގެ ރަށްތަކަށް ކުރިމަތިވެފައިވާ ނުރައްކާތެރި މައްސަލަތަކަށް އަލިއަޅުއްވާލައްވައި، ދެމެހެއްޓެނިވި އަދި މުޖުތަމަޢަށް އިސްކަންދޭ ޙައްލުތަކަކަށް ވަކާލާތު ކުރެއްވިއެވެ. އަޅުގަނޑުމެންގެ ބަޔާނުގައި، ދެފުށް ފެންނަ ހިންގުމަކާއި، ޒިންމާދާރު މާލީ އޮނިގަނޑުތަކެއްގެ މުހިންމުކަމާއި، ތިމާވެށި ހިމާޔަތްކުރުމާއި ތަރައްޤީގެ މަސައްކަތްތަކުގައި އިސްނެގުމަށް ލޯކަލް ކައުންސިލްތަކަށް ބާރުވެރިކަން ދިނުމުގެ މުހިންމުކަމުގެ މައްޗަށް ބާރުއެޅުއްވިއެވެ. މީގެ އިތުރުން، ރާއްޖޭގެ ރަށްތައް އިންތިހާ ދަރަޖައިގެ މަތީ ފަންތީގެ ފަތުރުވެރިކަމަށް ކުއްޔަށް ދޫކުރަމުންދާ ކަންބޮޑުވާންޖެހޭ އޮއިވަރަށް ސަމާލުކަން ގެންނެވިއެވެ. ނޫނު އަތޮޅުގެ 72 ރަށުގެ ތެރެއިން 25 ރަށެއް މިހާރުވެސް 100 އަހަރުގެ މުއްދަތަށް ކުއްޔަށް ދޫކޮށްފައިވާއިރު، މީގެ ސަބަބުން ތިމާވެއްޓަށް ބޮޑެތި ގެއްލުންތަކެއް ދަނީ ލިބެމުންނެވެ. މި މަޝްރޫޢުތަކުގެ ސަބަބުން، އުދައެރުމާއި ތޫފާންތަކުން ރަށްތައް ރައްކާތެރިކޮށްދޭ ގުދުރަތީ ނިޒާމުތައް ކަމަށްވާ ކުޅިތަކާއި ފާތައް ދަނީ ހަލާކުވަމުންނެވެ. ކުއްޔަށް ދޫކުރާ ކޮންމެ ރަށަކީ، މަސްވެރިކަން ކުރާ ސަރަޙައްދުތަކާއި، ދަނޑުބިންތަކާއި، މުޖުތަމަޢުގެ ދިރިއުޅުމާ ގުޅިފައިވާ ފަރުތަކަށް އޮތް ހުރަހެއްކަން އެމަނިކުފާނު ފާހަގަކުރެއްވިއެވެ.

މިހާރު އަޅުގަނޑުމެން ދަނީ މަރުކަޒީ ސަރުކާރާއެކު ޤާނޫނީ ހަނގުރާމައެއް ކުރަމުންނެވެ. އެއީ އިތުރަށް ރަށްތައް ކުއްޔަށް ދޫކުރުން ހުއްޓުވުމަށާއި، ވަކިން ހާއްސަކޮށް ރަށުގެ ގުދުރަތީ ނިޒާމަށާއި އާދަކާދައިގެ ދިރިއުޅުމަށް މުހިންމު ކުޅިތައް ހިމެނޭ ރަށްތައް ހިމާޔަތްކުރުމަށެވެ.

ރާއްޖެއަށް ދަނީ ތިމާވެށީގެ ގޮންޖެހުންތައް އިތުރުވަމުންނެވެ. އޭގެ ތެރޭގައި ރަށް ގިރުމާއި، އަތިރިމަތި ހަލާކުވުމާއި، ބައިނަލްއަޤުވާމީ އެހީގައި ހިންގާ ބޮޑެތި ބިން ހިއްކުމުގެ މަޝްރޫޢުތައް ފަދަ ގެއްލުންދެނިވި ކަންކަން ހިމެނެއެވެ. ކުޅިތައް ނެތިދިއުމާއި، ފެން ތަޣައްޔަރުވުމާއި، ބިންގަނޑު ހަލާކުވުމުގެ ސަބަބުން ރަށްރަށުގެ މުޖުތަމަޢުތައް އޮތީ ބޮޑު ނުރައްކަލެއްގެ ތެރޭގައެވެ. އަދި ދަނޑުވެރިކަން އެކަށީގެންވާ މިންވަރަށް ނުކުރެވޭތީ، އިމްޕޯޓަށް ބަރޯސާވާންޖެހުމުން ޤައުމުގެ ނާޒުކުކަން އިތުރުވާކަންވެސް ފާހަގަކުރެއްވިއެވެ. މީގެ އިތުރުން، ދުނިޔޭގެ އެހީގެ ފަންޑުތައް ތިމާވެއްޓާއި މުޖުތަމަޢަށް ފައިދާހުރި ކަންކަމުގެ ބަދަލުގައި، މަގު ހެދުން ފަދަ ދެމެހެއްޓެނިވި ނޫން އުމްރާނީ މަޝްރޫޢުތަކަށް ބޭނުންކުރާތީ އެކަމުގެ ކަންބޮޑުވުން ފާޅުކުރެއްވިއެވެ.

ގުޅިގެން މަސައްކަތްކުރާ އަދި ދެފުށް ފެންނަ ހިންގުމަކަށް ގޮވާލުން

މަރުކަޒީ ހިންގުމުގެ ސަބަބުން ކުރިމަތިވާ ހުރަސްތައް އަޅުގަނޑުމެން ބަޔާންކޮށްދިނީމެވެ. މީގެ ސަބަބުން ލޯކަލް ކައުންސިލްތަކުގެ ބާރު ހަނިވެ، ކުޅިތައް އާލާކުރުމާއި އަތިރިމަތި ބެލެހެއްޓުން ފަދަ މުހިންމު މަސައްކަތްތައް ކުރުމަށް ހުރަސްއެޅެއެވެ. އެމަނިކުފާނު ވަކާލާތު ކުރެއްވީ ލާމަރުކަޒީ، ގުޅިގެން މަސައްކަތްކުރާ އުސޫލަކަށެވެ. އެއީ ޤާނޫނީ އޮނިގަނޑުގެ ތެރެއިން ކައުންސިލްތަކަށް ބާރުދީ، ބައިނަލްއަޤުވާމީ އެހީތައް ދިގު މުއްދަތުގެ ދެމެހެއްޓެނިވި ޙައްލުތަކަށް އަމާޒުކުރުމަށެވެ.

ކުރިއަށް ދިއުމަށްޓަކައި އަޅުގަނޑުމެން ގޮވާލަނީ:

• ދެފުށް ފެންނަ ހިންގުމާއި ޒިންމާދާރުވުން: ވަސީލަތްތައް ބަހާލުމުގައި ޒިންމާދާރުވުމާއި، ނިންމުންތައް ނިންމުމުގައި މުޖުތަމަޢުގެ ލާބައާއި މަންފާއަށް އިސްކަންދިނުން ކަށަވަރުކުރުން.

  • އާދަކާދައިގެ ޢިލްމާއި ޒަމާނީ ހުނަރު އެއްކުރުން: މުޖުތަމަޢުގެ ތަޖުރިބާގެ ބޭނުން ހިފުމާއެކު، އައު ސައިންޓިފިކް ގޮތްތައް މަސައްކަތުގައި ހިމެނުން.

  • ,

    ލޯކަލް ހައްލުތަކަށް ބައިނަލްއަގުވާމީ މާލީ އެހީތެރިކަން: ކުރު މުއްދަތުގެ ތަރައްގީގެ ބަދަލުގައި، މުޖުތަމައު އިސްކޮށްގެން ކުރިއަށްގެންދާ ދެމެހެއްޓެނިވި މަސައްކަތްތަކަށް އިސްކަންދޭ މާލީ އޮނިގަނޑުތަކެއް ގާއިމުކުރުން.

  ދެމެހެއްޓެނިވި މުސްތަގުބަލަކަށް އޮތް ތަސައްވުރު

  ތިމާވެށީގެ ކުއްލި ގޮންޖެހުންތަކަށް ހައްލު ހޯދުމަށްޓަކައި، ދެފުށް ފެންނަ ސިޔާސަތުތަކާއި، ދެމެހެއްޓެނިވި އުސޫލުތަކާއި، އަދި ގުޅިގެން މަސައްކަތްކުރާނެ ހައްލުތަކަށް އެއްބާރުލުން ދިނުމަށް ބައިނަލްއަގުވާމީ މުޖުތަމައަށް އަޅުގަނޑުމެން ގޮވާލަމެވެ. ލޯކަލް ކައުންސިލްތަކަށް ބާރުވެރިކަން ދީ، އިހުގެ އާދަކާދަތަކަށް އިހުތިރާމްކޮށްގެން، ތަރައްގީއާއި ތިމާވެށި ހިމާޔަތްކުރުން އެކުގައި ކުރިއަށްދާނެ މުސްތަގުބަލެއް އޭނާ ތަސައްވުރު ކުރައްވައެވެ. މިއީ ރާއްޖޭގެ ތިމާވެށީގެ ނިޒާމުތަކާއި މުޖުތަމައުތަކުގެ ލާބައާއި މަންފާ ކަށަވަރުކޮށްދޭނެ ކަމެކެވެ.