ޤާނޫނީ ލަފާދޭ ފަރާތެއް (ރިޓެއިނަރ) - ޚިދުމަތުގެ އެއްބަސްވުމުގެ ފުރުޞަތު

މި ކުންފުންޏަށް ބޭނުންވާ ގާނޫނީ ލަފާ ދިނުމަށްޓަކައި، ރިޓެއިނަރ އުސޫލުން މަސައްކަތްކުރާނެ ގާބިލު ލީގަލް ކޮންސަލްޓަންޓެއް (ވަކި ފަރުދެއް ނުވަތަ ފާމެއް) ހޯދުމަށް ބޭނުންވެއެވެ. މި މަސައްކަތުގެ މަގުސަދަކީ ނޫނު އަތޮޅު ކުންފުނި (ނޫނު އެލް.އޭ.ސީ)، ނޫނު އަތޮޅު ކައުންސިލްގެ އިދާރާ އަދި ރަށު ކައުންސިލްތަކަށް ބޭނުންވާ ގާނޫނީ އަދި ރެގިއުލޭޓަރީ ލަފާ ފޯރުކޮށްދިނުމާއި، ގާނޫނުތަކާއި ގަވާއިދުތަކަށް އަމަލުކުރުން ކަށަވަރުކުރުމާއި، އަދި އިސްތިރާޖީ ނިންމުންތައް ނިންމުމުގައި އެހީތެރިކަން ފޯރުކޮށްދިނުމެވެ.

ދޭންޖެހޭ ހިދުމަތްތަކުގެ ދާއިރާ

ލީގަލް ކޮންސަލްޓަންޓް ފޯރުކޮށްދޭންޖެހޭ ހިދުމަތްތަކުގެ ތެރޭގައި ތިރީގައިވާ ކަންތައްތައް ހިމެނެއެވެ:

ހ. އާންމު ގާނޫނީ ލަފާދިނުން: ނޫނު އަތޮޅު ކުންފުނި، އަތޮޅު ކައުންސިލްގެ އިދާރާ އަދި ރަށު ކައުންސިލްތަކަށް ދިވެހިރާއްޖޭގެ އެންމެހާ ގާނޫނުތަކާ ގުޅޭ ފުރިހަމަ ގާނޫނީ އިރުޝާދު ދިނުން. މީގެ ތެރޭގައި ކުންފުނިތަކާބެހޭ، އެއްބަސްވުންތަކާބެހޭ، ވަޒީފާއާބެހޭ، ތިމާވެއްޓާބެހޭ އަދި ލާމަރުކަޒީ ގާނޫނުތައް ހިމެނެއެވެ. އަދި ނިންމުންތައް ނިންމުމުގައި އެހީތެރިވުމުގެ ގޮތުން، މުވައްޒަފުން ކުރާ ގާނޫނީ ސުވާލުތަކަށް އެކަށީގެންވާ ވަގުތުގައި ޖަވާބު ދިނުން.

ށ. އެއްބަސްވުންތަކާ ގުޅޭ ކަންކަން: އަތޮޅުގެ އިންފްރާސްޓްރަކްޗަރ، އާންމު ހިދުމަތްތައް އަދި ވަސީލަތްތައް ބެލެހެއްޓުމާ ގުޅޭ އެއްބަސްވުންތައް ޑްރާފްޓްކުރުމާއި، މުރާޖައާކުރުމާއި، އަދި މަޝްވަރާކުރުން. އަތޮޅު ކައުންސިލާއި ރަށު ކައުންސިލްތަކުން ހިންގާ މަޝްރޫއުތަކާއި ހަރަކާތްތަކުގައި ހިމެނޭ ގާނޫނީ ޒިންމާތަކާއި، ކުރިމަތިވެދާނެ ނުރައްކާތައް (risk assessment) ދެނެގަނެ، އެކަންކަމުން ރައްކާތެރިވުމަށް ބޭނުންވާ ފަންނީ ލަފާ ދިނުން.

ނ. ގަވާއިދުތަކަށް އަމަލުކުރުމާއި ހުއްދަތައް ހޯދުން: ކުންފުނި، އަތޮޅު ކައުންސިލް އަދި ރަށު ކައުންސިލްތަކަށް އަސަރުކޮށްފާނެ ފަދަ ގާނޫނީ އަދި ގަވާއިދަށް އަންނަ ބަދަލުތައް ދެނެގަނެ، އެކަންކަމާ ގުޅޭ ލަފާ ދިނުން. ހާއްސަކޮށް ބިން ބޭނުންކުރުމާއި، ތިމާވެށި ހިމާޔަތްކުރުމާއި، އަދި ލާމަރުކަޒީ ހިންގުމާ ގުޅޭ ކަންކަމުގައި. މީގެ އިތުރުން، ހުރިހާ ގަވާއިދުތަކަށް އަމަލުކުރާކަން ކަށަވަރުކުރުމާއި، އަތޮޅުތެރޭގައި ހިންގާ މަޝްރޫއުތަކަށް ބޭނުންވާ ހުއްދަތަކާއި ލައިސަންސްތައް ހޯދުމުގައި އެހީތެރިވުން.

ރ. މައްސަލަ ހައްލުކުރުމާއި ގާނޫނީ ވަކާލާތުކުރުން: ގާނޫނީ ހިލާފުތައް ހައްލުކުރުމަށްޓަކައި މަޝްވަރާކުރުމާއި މެދުވެރިއެއްގެ ދައުރު އަދާކުރުން ފަދަ ހަރުދަނާ އުސޫލުތައް އެކުލަވާލައި ތަންފީޒުކުރުން. މައްސަލަ ހައްލުކުރުމުގެ މަރުހަލާތަކުގައި އިދާރާތައް ތަމްސީލުކުރުމާއި، ލާމަރުކަޒީ ހިންގުމާއި އާންމު މަސްލަހަތާ ގުޅުންހުރި މައްސަލަތަކުގައި ޝަރީއަތާ ގުޅޭ އިސްތިރާޖީ ލަފާ ދިނުން.

ބ. ކޯޕަރޭޓް އަދި ލޯކަލް ގަވަރނަންސް: ނޫނު އަތޮޅު ކުންފުނީގެ ކޯޕަރޭޓް ގަވަރނަންސް އަދި އަތޮޅު ކައުންސިލާއި ރަށު ކައުންސިލްތަކުގެ ހިންގުމާ ގުޅޭގޮތުން، ގާނޫނުތަކާ އެއްގޮތަށް އަމަލުކުރުމަށް ބޭނުންވާ ފަންނީ ލަފާ ދިނުން. އަދި ލާމަރުކަޒީ ހިންގުމަށް ބޭނުންވާ ގާނޫނީ ލިޔެކިޔުންތައް ތައްޔާރުކުރުމާއި ބެލެހެއްޓުމުގައި އެހީތެރިވުން.

ޅ. ގާނޫނީ ތަމްރީނާއި ގާބިލުކަން އިތުރުކުރުން: ހުރިހާ އިދާރާތަކެއްގެ މެނޭޖްމަންޓާއި މުވައްޒަފުންނަށް އަމާޒުކޮށްގެން، ރަށު ފެންވަރުގައި ތަރައްގީގެ މަސައްކަތްތަކާއި، ތިމާވެށި ބެލެހެއްޓުމާއި، އަދި އާންމު ހިދުމަތްތައް ފޯރުކޮށްދިނުމާ ގުޅޭ ގާނޫނީ މައްސަލަތަކަށް ހާއްސަ ތަމްރީނުތަކާއި ވޯކްޝޮޕްތައް ހިންގުން.

,

ޖ. ޤާނޫނީ ދިރާސާ އަދި ތަޙުލީލުކުރުން: ލޯކަލް ގަވަރނަންސް، ތިމާވެށީގެ ޤާނޫނު، އަދި ތަރައްޤީގެ މަޝްރޫޢުތަކާ ގުޅުންހުރި ކަންކަމުގައި ފުންކޮށް ޤާނޫނީ ދިރާސާތަކާއި ތަޙުލީލުތައްކޮށް، ސާފު އަދި އަމަލީގޮތުން ބޭނުންކުރެވޭނެ މަޢުލޫމާތު ފޯރުކޮށްދިނުން.

ޏ. ބައްދަލުވުންތަކުގައި ބައިވެރިވުމާއި މަޝްވަރާދިނުން: ކުންފުނި، އަތޮޅު އިދާރާ، އަދި ރަށު ކައުންސިލްތަކުގެ ބައްދަލުވުންތަކަށް ބޭނުންވާ ހާލަތްތަކުގައި ހާޒިރުވެ، އިސްތިރާޖީ ނިންމުންތައް ނިންމުމުގައި ޤާނޫނީ ލަފަޔާއި އެހީތެރިކަން ފޯރުކޮށްދިނުން.

ހުށަހަޅަންޖެހޭ ތަކެތި (Deliverables)

ކޮންސަލްޓަންޓް ތިރީގައިވާ ތަކެތި ފޯރުކޮށްދޭންވާނެއެވެ:

ހ. ވަގުތުން ވަގުތަށް ދެވޭ ސައްޙަ ޤާނޫނީ ލަފާ.

ށ. ޑްރާފްޓްކޮށްފައިވާ އަދި މުރާޖަޢާކޮށްފައިވާ ޤާނޫނީ ލިޔެކިޔުންތައް.

ނ. ޤާނޫނުތަކާއި ގަވާއިދުތަކަށް އަންނަ ބަދަލުތަކާ ގުޅޭ ރިޕޯޓުތައް.

ރ. ޤާނޫނީ ތަމްރީނުތަކަށް ބޭނުންވާ ތަކެތި.

ބ. ނިންމާފައިވާ މަސައްކަތްތަކުގެ ގަވާއިދުން ހުށަހަޅާ ރިޕޯޓުތައް.

ޝަރުތުތަކާއި ތަޖުރިބާ

ތިރީގައިވާ ޝަރުތުތައް ފުރިހަމަވާ ފަރުދުންނަށް ނުވަތަ ކުންފުނިތަކަށް ކުރިމަތިލުމުގެ ފުރުޞަތު ހުޅުވާލަމެވެ:

ކޮންސަލްޓަންޓްގެ ކިބައިގައި ތިރީގައިވާ ޝަރުތުތަކާއި ތަޖުރިބާ ހުންނަންވާނެއެވެ:

ހ. ބަލައިގަނެވޭ ޔުނިވަރސިޓީއަކުން ބެޗްލަރ އޮފް ލޯސް (LLB) ހާސިލުކޮށްފައިވުން (ކުންފުންޏެއްނަމަ، މިއީ ޓީމުގެ ވަކިވަކި މެންބަރުންގެ ކިބައިގައި ހުންނަންޖެހޭނެ ޝަރުތެކެވެ).

ށ. ދިވެހިރާއްޖޭގެ ޖުމްހޫރިއްޔާގައި ޤާނޫނީ ވަކީލުކަން ކުރުމުގެ ސައްޙަ ހުއްދައެއް އޮތުން.

ނ. ޤާނޫނީ ދާއިރާގައި މަދުވެގެން 03 އަހަރު ދުވަހުގެ ތަޖުރިބާ ހުރުން، ޚާއްޞަކޮށް މަދަނީ އަދި/ނުވަތަ ކޯޕަރޭޓް ޤާނޫނީ ދާއިރާއިން.

ރ. ދިވެހިރާއްޖޭގެ ޤާނޫނުތަކާއި ގަވާއިދުތަކަށް ފުރިހަމައަށް އަހުލުވެރިވެފައިވުން.

ބ. މުޢާމަލާތުކުރުމުގެ ހުނަރާއި މީހުންނާ ގުޅިގެން މަސައްކަތްކުރުމުގެ ފުރިހަމަ ހުނަރު ހުރުން.

ޅ. ސާފު އަދި އަމަލީގޮތުން ބޭނުންކުރެވޭނެ ޤާނޫނީ ލަފާ ދިނުމުގެ ޤާބިލުކަން ހުރުން.

ކ. އެއްބަސްވުންތައް އެކުލަވާލުމާއި (contract drafting) މަޝްވަރާކޮށް ގޮތްތައް ނިންމުމުގެ (negotiation) ސާބިތު ތަޖުރިބާ ހުރުން.

އ. މައްސަލަ ހައްލުކުރުމުގައި (dispute resolution) ކްލައިންޓުން ތަމްސީލުކުރުމުގެ ތަޖުރިބާ ހުރުން.

ވ. ޝަރީޢަތްތަކުގައި ވަކާލާތުކުރުމުގެ (litigation) ތަޖުރިބާ ހުރުން.

މަސައްކަތުގެ މުއްދަތު

މަސައްކަތުގެ މުއްދަތަކީ ފުރަތަމަ އެއް އަހަރު ދުވަހެވެ. އަދި ދެފަރާތުން އެއްބަސްވާނަމަ މުއްދަތު އިތުރުކުރެވިދާނެއެވެ.

ރިޓެއިނަރ ފީ ހުށަހެޅުން

ހުށަހަޅާ ޕްރޮޕޯޒަލްގައި ތިރީގައިވާ ކަންކަން ހިމަނަންވާނެއެވެ:

ހ. ދެވޭ ޚިދުމަތްތަކަށް މަހަކު ނަގާނެ ރިޓެއިނަރ ފީ ދިވެހި ރުފިޔާއިން.

ށ. ރިޓެއިނަރގެ ދާއިރާއިން ބޭރުން ދެވޭ އިތުރު ޚިދުމަތްތަކަށް (ޝަރީޢަތުގައި ވަކާލާތުކުރުން ހިމެނޭގޮތަށް) ގަޑިއިރަކަށް ނަގާނެ ފީ ދިވެހި ރުފިޔާއިން.

ނ. ފައިސާ ދެއްކުމުގައި އަމަލުކުރާނެ އުސޫލުތައް.

ހުށަހަޅަންޖެހޭ ސުންގަޑި

ޝައުޤުވެރިވާ ފަރާތްތަކުން 18 މާރިޗު 2025 ގެ 14:00 ގެ ކުރިން ޕްރޮޕޯޒަލް ހުށަހަޅަންވާނެއެވެ. ޕްރޮޕޯޒަލް އީމެއިލް މެދުވެރިކޮށް admin@noonunaturally.com އަށް ނުވަތަ ބަންދުކޮށްފައިވާ ސިޓީއުރައެއްގައި ތިރީގައިވާ އެޑްރެހަށް ހުށަހެޅިދާނެއެވެ:

,

އޮޕަރޭޝަންސް ޑިޕާޓްމަންޓް، ނޫނު އަތޮޅު ކޮމްޕެނީ LAC.LTD.
ނޫނު އަތޮޅު ކައުންސިލްގެ އިދާރާ، ނ. މަނަދޫ

ހުށަހަޅާ ލިޔެކިޔުންތަކުގައި ތިރީގައިވާ ތަކެތި ހިމަނަންވާނެއެވެ:

އަމިއްލަ ފަރުދުންނަށް:

• ޝައުގުވެރިކަން ފާޅުކުރާ ސިޓީ (EOI).

  • ދިވެހި ރައްޔިތެއްކަން އަންގައިދޭ ކާޑުގެ ކޮޕީ.

  • ތައުލީމީ ސެޓުފިކެޓުތަކުގެ ކޮޕީ.

  • މުއްދަތު ހަމަނުވާ ގާނޫނީ ވަކީލުކަމުގެ ހުއްދައިގެ ކޮޕީ.

  • ގުޅުންހުރި ތަޖުރިބާ އާއި ހުނަރުތައް ހިމެނޭ ވަނަވަރު (CV).

  • މިހާރުގެ ނުވަތަ ކުރީގެ ވަޒީފާދިން ފަރާތްތަކުގެ ރެފަރެންސް ސިޓީ.

  ކުންފުނި/ފާމްތަކަށް:

  • ޝައުގުވެރިކަން ފާޅުކުރާ ސިޓީ (EOI).

    • ވިޔަފާރި ރަޖިސްޓްރީގެ ކޮޕީ.

    • ޓެކްސް ކްލިއަރެންސް ރިޕޯޓް.

    • ކަނޑައަޅާފައިވާ މަންދޫބުގެ ދިވެހި ރައްޔިތެއްކަން އަންގައިދޭ ކާޑުގެ ކޮޕީ.

    • މަސައްކަތުގެ ދާއިރާއާ ގުޅޭ ގާބިލުކަން ހާމަކޮށްދޭ ފާމް ޕްރޮފައިލް.

    • މަދުވެގެން ޖުމްލަ 3 އަހަރުގެ މަސައްކަތުގެ ތަޖުރިބާ ހުރިކަން އަންގައިދޭ ރެފަރެންސް ސިޓީ.

    އިވެލުއޭޝަން ކްރައިޓީރިއާ (މާކްސް ދެވޭނެ އުސޫލު)

    ހުށަހެޅުންތައް އިވެލުއޭޓް ކުރެވޭނީ ތިރީގައިވާ މިންގަނޑުތަކަށް ބަލައިގެންނެވެ:

    • ތައުލީމީ ގާބިލުކަން 40

      އެކްރެޑިޓް ކުރެވިފައިވާ ސެޓުފިކެޓް – 20.
      މުއްދަތު ހަމަނުވާ ގާނޫނީ ވަކީލުކަމުގެ ހުއްދަ – 20.

      • ތަޖުރިބާ – 20.

        • މަސައްކަތުގެ ފެންވަރު (ލިބިފައިވާ ރެފަރެންސް މައުލޫމާތަށް ބަލައި) 10

        • މުާމަލާތުކުރުމުގެ ހުނަރު (އިންޓަވިއު) 30

        އަޅުގަނޑުމެންގެ ސްޓްރެޓީޖިކް ލަނޑުދަނޑިތައް ހާސިލުކުރުމަށް އެހީތެރިވެދިނުމަށް، ޝަރުތުހަމަވާ ގާނޫނީ ވަކީލުންނާއި ފާމްތަކުން މި ފުރުސަތުގެ ބޭނުން ހިފުމަށް ދައުވަތު އަރުވަމެވެ. އިތުރު މައުލޫމާތު ސާފުކުރެއްވުމަށް admin@noonunaturally.com އަށް އީމެއިލް ކުރެއްވުން އެދެމެވެ.

        ތިޔަ ފަރާތްތަކުގެ ހުށަހެޅުންތަކަށް އަޅުގަނޑުމެން އިންތިޒާރު ކުރަމެވެ.