ވެހިކަލް ލައިސަންސް އިމްތިހާނު ޓްރެކް މަޝްރޫޢު ރައްޔިތުންނަށް ދެވޭ ޚިދުމަތްތައް ރަނގަޅުކުރުމުގެ އަޒުމުގައި ކުރިއަށް

ނ. އަތޮޅު އެއްގަމު އުޅަނދު ދުއްވުމުގެ ލައިސަންސް އިމްތިހާނު ކުރާ ޓްރެކްގެ މަސައްކަތް، ބިންގަނޑު އެއްވަރުކުރުމުގައި ދިމާވި ދަތިތަކަކާ ގުޅިގެން މެދުކަނޑާލުމަށްފަހު އަލުން ފަށައިފިއެވެ. ގާނޫނީ އޮނިގަނޑު ބަޔާންކުރާ ގޮތުން، މިފަދަ އަސާސީ ހިދުމަތްތައް ގާއިމުކުރުމަށް ބޭނުންވާ ފައިސާ ހަމަޖެއްސުމާއި ތަރައްގީކުރުމަކީ ކަމާބެހޭ ވުޒާރާގެ މަސްއޫލިއްޔަތެކެވެ. ނަމަވެސް، މިއީ ރައްޔިތުންނަށް ނުހަނު މުހިންމު މަޝްރޫއަކަށް ވެފައި، މިކަމަށް ވުޒާރާއިން ހާއްސަ ބަޖެޓެއް ކަނޑައަޅާފައި ނުވާތީ، މަސައްކަތް ހުއްޓުމެއްނެތި ހަލުވިކަމާއެކު ކުރިއަށް ގެންދިއުމަށްޓަކައި ކައުންސިލްގެ ބްލޮކް ގްރާންޓުން ސަލާމަތްކުރެވިފައިވާ ފައިސާ މި މަޝްރޫއަށް ވަނީ ހަމަޖައްސާފައެވެ.

ޖުމްލަ 966,283.61 ދިވެހި ރުފިޔާއަށް 2023 ވަނަ އަހަރު ސީ ޝައިން އިންވެސްޓްމަންޓާ ހަވާލުކުރި މި މަޝްރޫއު މެދުކަނޑާލަން ޖެހުނީ، މަސައްކަތް ކުރިއަށްދިޔަ އިރު ދިމާވި ފަންނީ އަދި ބިންގަނޑު އެއްވަރުކުރުމުގެ ދަތިތަކަށް ހައްލެއް ހޯދުމަށެވެ. މިކަން ޒިންމާދާރުކަމާއެކު ހައްލުކުރުމަށްޓަކައި، ކޮންޓްރެކްޓަށް ގެނެވުނު ބަދަލެއްގެ ގޮތުގައި އިތުރު 119,658.60 ރުފިޔާ ވަނީ ހަމަޖައްސާފައެވެ. މި މަސައްކަތްތަކުގެ ނަތީޖާއެއްގެ ގޮތުން، 20,800 އަކަފޫޓުގެ މި ޓްރެކްގެ ބޭސް ސޭންޑް ކާސްޓިންގް، ބިން އެއްވަރުކުރުން އަދި ސައިޓް ލޭއައުޓްގެ މަސައްކަތްތައް މިހާރު ވަނީ ނިމިފައެވެ. ކައުންސިލުން ދަނީ މަސައްކަތުގެ ފެންވަރު ހިފެހެއްޓުމަށާއި ދެފުށް ފެންނަ ގޮތަށް މަޝްރޫއު ކުރިއަށް ގެންދިއުމަށްޓަކައި ގާތުން ބަލަމުންނެވެ. އުންމީދަކީ ކުރިއަށް އޮތް ދެ މަސްދުވަހުގެ ތެރޭގައި މަސައްކަތް އެއްކޮށް ނިންމާލުމެވެ.

މި މަޝްރޫއު ކުރިއަށް ގެންދިއުމަށް ބޭނުންވާ ބިން ހަމަޖައްސައިދީ، ދެއްވި އެއްބާރުލުމަށްޓަކައި މަނަދޫ ކައުންސިލަށް އިހުލާސްތެރި ޝުކުރެއް ދަންނަވަމެވެ. އަދި މި މަސައްކަތް ފެންވަރު ރަނގަޅުކޮށް ކުރިއަށް ގެންދިއުމުގައި ކޮންޓްރެކްޓަރު، ސީ ޝައިން އިންވެސްޓްމަންޓުން ދައްކަވާ ސާބިތުކަމާއި ފަންނީ ހުނަރަށް ޝުކުރު އަދާކުރަމެވެ. އެ ފަރާތުގެ ބައިވެރިވުމަކީ ރައްޔިތުންގެ ލާބައަށްޓަކައި ކުރިއަށްގެންދާ މި މަސައްކަތުގައި ވަރަށް މުހިންމު ދައުރެއް އަދާކުރާ ކަމެކެވެ.

ދެމެހެއްޓެނިވި އަދި ހުރިހާ ރައްޔިތުންނަށް ބޭނުންކުރެވޭނެ ފަދަ ވަސީލަތްތައް ގާއިމުކުރުމަށް ގެންގުޅޭ ތަސައްވަރުގެ ދަށުން، މި މަޝްރޫއުގެ އިތުރު ބައެއްގެ ގޮތުގައި މި ސަރަހައްދުގައި ކޮމިއުނިޓީ ޕާކެއް ތަރައްގީކުރުމުގެ މަސައްކަތް ވެސް ދަނީ ރޭވެމުންނެވެ. މިއީ އާންމު ހިދުމަތްތަކުގެ ފެންވަރު މަތިކޮށް، ރައްޔިތުންގެ ދުޅަހެޔޮކަމަށް ކައުންސިލުން ދޭ އަހައްމިއްޔަތު ރަމްޒުކޮށްދޭ ކަމެކެވެ. ލައިސަންސް ޓްރެކްގެ މަސައްކަތް ކުރިއަށްދިއުމަކީ، ހިދުމަތްތައް ރަނގަޅުކުރުމަށް ކައުންސިލުން އިސްނަގައިގެން ކުރަމުންދާ މަސައްކަތުގެ ހެއްކެކެވެ.