އެމްއައިޓީޑީސީއާއެކު މައިސް ޓޫރިޒަމްގެ ފުރުސަތުތައް ދިރާސާކުރުން

ނޫނު އަތޮޅުގައި މައިސް (މީޓިންގްސް، އިންސެންޓިވްސް، ކޮންފަރެންސަސް، އަދި އެގްޒިބިޝަންސް) ޓޫރިޒަމް ތަރައްޤީކުރުމަށް ހުރި ފުރުޞަތުތައް ދެނެގަތުމަށްޓަކައި، މޯލްޑިވްސް އިންޓެގްރޭޓެޑް ޓޫރިޒަމް ޑިވެލޮޕްމަންޓް ކޯޕަރޭޝަން (އެމް.އައި.ޓީ.ޑީ.ސީ) އާއެކު އަޅުގަނޑުމެން ދަނީ މަޝްވަރާކުރަމުންނެވެ. މި މަޝްވަރާތަކުގެ މަޤްޞަދަކީ އަތޮޅު ތަރައްޤީގެ އިސްތިރާތީޖީގެ ދަށުން، ފަތުރުވެރިކަން ސިންދަފާތުކޮށް، ރަށްތަކުގެ އިޤްތިޞާދީ ކުރިއެރުމަށް މަގުފަހިވާނެ ގޮތްތަކެއް ހޯދުމެވެ.

މި ފަހުން ބޭއްވުނު ބައްދަލުވުންތަކުގައި، ކައުންސިލްގެ މިލްކިއްޔާތުގައި ހުރި ތަންތަން އަލުން ބޭނުންކުރަން ފެށުމާ ބެހޭގޮތުން ޚިޔާލު ބަދަލުކުރެވުނެވެ. މީގެ ތެރޭގައި މަނަދޫގައި ކޮންވެންޝަން ހައުސްއެއް ތަރައްޤީކޮށް، މައިސް އިވެންޓްތައް ބޭއްވޭނެ ފަދަ މާޙައުލެއް ޤާއިމުކުރުން ހިމެނެއެވެ. މިއީ ފަތުރުވެރިކަމުގެ ދާއިރާ ފުޅާކޮށް، ރަށުގެ ވިޔަފާރިތަކަށާއި ރައްޔިތުންނަށް އައު ފުރުޞަތުތަކެއް ހޯދައިދިނުމަށް އެޅޭ މުހިންމު ފިޔަވަޅެކެވެ.

މި މަޝްވަރާތަކުގައި މަޝްރޫޢުތަކުގެ އިސްކަންދޭނެ ތަރުތީބާއި، އޭގެ ސަބަބުން ކުރާނެ އަސަރުތަކާއި، އަދި ފީޒިބިލިޓީ ބެލުމަށް ކުރަންޖެހޭ ކަންކަމާ ބެހޭގޮތުން ވާހަކަދެކެވުނެވެ. އަދި ކަމާބެހޭ ފަރާތްތަކުން ސައިޓްތަކަށް ޒިޔާރަތްކޮށް، ތަފްޞީލީ ދިރާސާތައް ކުރުމަށް ވަނީ އެއްބަސްވެފައެވެ. މިއީ ކޮންމެ ތަރައްޤީއަކީވެސް ދެމެހެއްޓެނިވި ގޮތެއްގައި އަދި ސަގާފީ އަގުތައް ހިމާޔަތްކުރެވޭނެ ގޮތަށް ކުރިއަށްދާ ކަންކަންކަން ކަށަވަރުކުރުމަށެވެ.

މި މަސައްކަތަކީ އިޤްތިޞާދީ ކުރިއެރުމާއި، ރައްޔިތުންގެ ލާބައާއި، އަދި ތިމާވެށި ރައްކާތެރިކުރުމުގެ މެދުގައި ހަމަހަމަކަން ހިފަހައްޓައިގެން ތަރައްޤީ ހޯދުމަށް ކުރެވޭ މަސައްކަތެކެވެ. މިހާތަނަށް ރަސްމީ އެއްބަސްވުމެއްގައި ސޮއިކުރެވިފައި ނުވިނަމަވެސް، އެމް.އައި.ޓީ.ޑީ.ސީ އާއެކު މި ޚިޔާލުތައް އިތުރަށް ދިރާސާކޮށް، ގުޅިގެން ކުރިއަށްދެވޭނެ މަގުތައް ހޯދުމަށް އަޅުގަނޑުމެން ދެމިތިބޭނަމެވެ.

ނޫނު އަތޮޅާއި އަތޮޅުގެ ރައްޔިތުންގެ ލާބައަށްޓަކައި ކުރެވޭ މި މަޝްވަރާތަކުގެ ތަފްޞީލުތައް ހިއްސާކުރަމުންދާނެ ކަމުގެ ޔަޤީންކަން އަރުވަމެވެ. އަޅުގަނޑުމެންގެ އުންމީދަކީ ފަތުރުވެރިކަމުގެ ޒަރީޢާއިން ރައްޔިތުން ބާރުވެރިކުރުވައި، އިޤްތިޞާދީ ގޮތުން ވަރުގަދަ، ދެމެހެއްޓެނިވި މުސްތަޤްބަލެއް ބިނާކުރުމެވެ.