ސްވޮޕް ޕްރޮގްރާމްގެ ދަށުން ޒީރޯ ވޭސްޓް މޯލްޑިވްސްއިން ނުރައްކާތެރި ކުނި މެނޭޖްކުރުމުގެ ހައްލުތައް ތަންފީޒުކުރަން ފަށައިފި

ޒީރޯ ވޭސްޓް މޯލްޑިވްސް އިން "ވެށި ސްމޯލް ގްރާންޓްސް ޕްރޮގްރާމް" ގެ ދަށުން ނޫނު އަތޮޅުގައި "ސަސްޓެއިނަބަލް ވޭސްޓް އެލްޓަނޭޓިވްސް ޕްރޮގްރާމް" (ސްވޮޕް) އިފްތިތާޙުކޮށް، ނުރައްކާތެރި ކުނި މެނޭޖުކުރުމުގައި އައު ފިޔަވަޅެއް އަޅައިފިއެވެ. މިއީ ނުރައްކާތެރި ކުނި އުފެދޭ މިންވަރު މަދުކުރުމަށާއި، އޭގެ ސަބަބުން ތިމާވެއްޓަށާއި ސިއްހަތަށް ކުރާ ނޭދެވޭ އަސަރުތަކަށް އާންމުން ހޭލުންތެރިކުރުވުމަށް ކުރިއަށްގެންދާ މުހިންމު މަސައްކަތެކެވެ.

މުޖުތަމައުގެ ހާލަތު ދެނެގަތުމާއި، އާންމުން ހޭލުންތެރިކުރުވުމާއި، ކަމާބެހޭ ފަރާތްތަކާ މަޝްވަރާކޮށްގެން ކުރިއަށްގެންދާ މި މަޝްރޫއުގެ ދަށުން ނޫނު އަތޮޅުގެ އަށް ރަށެއްގައި (މާފަރު، މަނަދޫ، މަގޫދޫ، ލަންދޫ، މާޅެންދޫ، ކެނދިކުޅުދޫ، ކުޑަފަރި އަދި ހެނބަދޫ) ބޮޑެތި ކުރިއެރުންތަކެއް ވަނީ ހޯދާފައެވެ. މި މަޝްރޫއުގެ އަމާޒަކީ ނޫނު އަތޮޅުގެ މީހުން ދިރިއުޅޭ ހުރިހާ 13 ރަށަކަށް މި ހަރަކާތްތައް ފުޅާކުރުމެވެ.

ފަހަކުން ކުޑަފަރި އަދި މާޅެންދޫގައި ބޭއްވުނު މަސައްކަތު ބައްދަލުވުންތަކުގައި ރަށު ކައުންސިލްތަކާއި، މުދައްރިސުންނާއި، ސިއްހީ ހިދުމަތްތެރިން އަދި އާންމު ރައްޔިތުން ވަނީ އަމަލީގޮތުން ބައިވެރިވެފައެވެ. މި ސެޝަންތަކުގައި ނުރައްކާތެރި ކުނި އުފެދޭ ގޮތްތައް ދެނެގަތުމާއި، ނުރައްކާތެރި ތަކެތީގައި ހުންނަ ލޭބަލްތައް ދެނެގަތުމާއި، ރައްކާތެރިގޮތުގައި ކުނި ނައްތާލުމާ ގުޅޭގޮތުން މައުލޫމާތު ދީފައިވެއެވެ. އަދި އަވަށްޓެރި ރަށްރަށުގެ ކައުންސިލްތަކުން މިކަމަށް ދެއްވި ޝައުގުވެރިކަމުން، މިއީ އެހެން އަތޮޅުތަކަށްވެސް ނަމޫނާއަކަށް ވެގެންދާނެ ޕްރޮގްރާމެއްކަން ހާމަވެގެންދިޔައެވެ.

ސްވޮޕް މަޝްރޫއުގެ އެންމެ ފާހަގަކޮށްލެވޭ އެއް ބަޔަކީ ފައިބަރު ކުނި މެނޭޖުކުރުމަށް ހާއްސަ އުސޫލެއް އެކުލަވާލުމެވެ. މިއީ އޮޑިދޯނިފަހަރު ބަނުމާއި މަރާމާތުކުރުމުގެ ސިނާއަތުގައި އިތުރުވަމުންދާ ފައިބަރު ކުނީގެ ސަބަބުން ތިމާވެއްޓަށް ކުރާ އަސަރު ކުޑަކުރުމަށް އެކުލަވާލާ އުސޫލެކެވެ. މި އުސޫލު އެކުލަވާލަނީ ހެލްތު ޕްރޮޓެކްޝަން އެޖެންސީ (އެޗް.ޕީ.އޭ)، މިނިސްޓްރީ އޮފް ޓޫރިޒަމް، މިނިސްޓްރީ އޮފް އެންވަޔަރަންމަންޓް، ނޫނު އަތޮޅު ކައުންސިލް އަދި ސިނާއީ ދާއިރާގެ މުހިންމު ފަރާތްތަކާ މަޝްވަރާކޮށްގެންނެވެ.

މި މަޝްރޫއަކީ ކެމިކަލްތައް ރަނގަޅު ގޮތުގައި މެނޭޖުކުރުމުގެ ތެރެއިން "ޕާސިސްޓަންޓް އޯގަނިކް ޕޮލިއުޓަންޓްސް" (ޕީ.އޯ.ޕީސް) އާ ގުޅޭގޮތުން ރާއްޖެއިން ގެންގުޅޭ ގައުމީ ސިޔާސަތާ އެއްގޮތަށް ކުރިއަށްދާ މަސައްކަތެކެވެ. މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީގެ އެހީތެރިކަމާއެކު ކުރިއަށްދާ މި މަޝްރޫއަކީ ގްލޯބަލް އެންވަޔަރަންމަންޓް ފެސިލިޓީ (ޖީ.އީ.އެފް) ގެ އެހީގައި، ޔޫ.އެން.ޑީ.ޕީ މޯލްޑިވްސްއާ ގުޅިގެން ހިންގާ ހަރަކާތެކެވެ.

މުޖުތަމައުގެ ބައިވެރިވުމާއެކު ގައުމީ ފެންވަރުގެ ލަނޑުދަނޑިތަކަށް ވާސިލުވުމަށް މަސައްކަތްކުރާ ސްވޮޕް މަޝްރޫއުގެ ސަބަބުން، ނޫނު އަތޮޅާއި މުޅި ރާއްޖޭގެ ރަށްތަކުގެ ތިމާވެށި ރައްކާތެރި އަދި ދެމެހެއްޓެނިވި ތަނަކަށް ހެދުމަށް މަގުފަހިވެގެންދާނެއެވެ.