ލާމަރުކަޒީ ނިޒާމާއި، އެކުލެވޭ މުޖުތަމައެއް އަދި މޫސުމަށް އަންނަ ބަދަލުތަކާ ކުރިމަތިލުމުގެ ޤާބިލްކަން އިތުރުކުރުމާ ބެހޭ ޕެނަލް މަޝްވަރާ

9 އިން 10 ޑިސެމްބަރު 2024 އަށް ކުރިއަށްދިޔަ އެންޓި-ކޮރަޕްޝަން ކޮންފަރެންސްގެ ތެރެއިން، ޓްރާންސްޕޭރެންސީ މޯލްޑިވްސް އާއި އެންޓި-ކޮރަޕްޝަން ކޮމިޝަން ގުޅިގެން ބޭއްވި މުހިންމު ޕެނަލް މަޝްވަރާއެއްގައި، ނޫނު އަތޮޅު ކައުންސިލާއި އެހެނިހެން ބައިވެރިން ފާހަގަކުރި ގަވަރނަންސް ނުވަތަ ހިންގުމުގެ ނިޒާމުގައި ހުރި މުހިންމު ގޮންޖެހުންތަކަށް އަލިއަޅުވާލައިފިއެވެ. މި މަޝްވަރާއަކީ ޒުވާނުންނާއި ނުކުޅެދުންތެރިކަން ހުންނަ ފަރާތްތަކުގެ އިސްލީޑަރުންނަށް މި މައްސަލަތައް ވަޒަންކޮށް، އެންމެންގެ ބައިވެރިވުން އިތުރުކުރުމަށާއި، ހިންގުން ހަރުދަނާކުރުމަށާއި، އަދި މޫސުމީ ބަދަލުތަކަށް ކެތްތެރިވުމުގެ ގާބިލުކަން އިތުރުކުރުމަށް ކުރެވިދާނެ ކަންކަމާ ގުޅޭގޮތުން ޚިޔާލު ބަދަލުކުރުމަށް ލިބުނު މުހިންމު ފުރުސަތެކެވެ.

ފާހަގަކުރެވުނު ގޮންޖެހުންތައް

ލޯކަލް ގަވަރނަންސް ނުވަތަ ރަށު ފެންވަރުގައި ހިންގުމުގެ ނިޒާމަށް ހުރަސްއަޅާ ބައެއް މުހިންމު ގޮންޖެހުންތައް ނޫނު އަތޮޅު ކައުންސިލުން ފާހަގަކުރިއެވެ. މަރުކަޒީކޮށް ގޮތް ނިންމުމުގެ ސަބަބުން ކުރިމަތިވާ މާލީ ދަތިތަކަކީ ބޮޑު ހުރަހަކަށް ވަނީ ވެފައެވެ. މިގޮތަށް ކަންކަން މަރުކަޒީވެފައި އޮތުމުގެ ސަބަބުން، ރަށު ފެންވަރުގައި މުޖުތަމައަށް ބޭނުންވާ ކަންކަމަށް އިސްކަންދީގެން ވަސީލަތްތައް މެނޭޖުކުރުމަށް ކައުންސިލަށް އޮންނަ ފުރުސަތު ހަނިވެގެންދެއެވެ. މީގެ އިތުރުން، އަންހެނުންނާއި، ޒުވާނުން އަދި ނުކުޅެދުންތެރިކަން ހުންނަ ފަރާތްތަކަށް ހިންގުމުގެ ނިޒާމުގައި ތަމްސީލުވުމަށް ބޮޑެތި ހުރަސްތަކެއް ހުރުމުން، މުހިންމު ނިންމުންތައް ނިންމާއިރު އެފަރާތްތަކުގެ އަޑު ނީވޭކަން ފާހަގަކުރެވުނެވެ.

މުޖުތަމައުގެ ބައިވެރިވުން އިތުރުކުރުމަކީވެސް އަވަސް އިސްލާހީ ފިޔަވަޅުތަކެއް ބޭނުންވާ ދާއިރާއެއްގެ ގޮތުގައި ފާހަގަކުރެވުނެވެ. މިހާރު ހުރި ހިންގުމުގެ ނިޒާމުތަކުގައި އާންމުންގެ ބޮޑު ބައިވެރިވުމަކަށް ފުރުސަތު ލިބޭނެ ހަރުދަނާ މަގުތަކެއް ނެތުމުގެ ސަބަބުން، އިތުބާރު ކުޑަވެ، ނިންމުންތައް ނިންމާ ފަރާތްތަކާއި މުޖުތަމައުގެ މެދުގައި އޮންނަ ގުޅުން ދަނީ ކެނޑެމުންނެވެ. އަދި ސަރުކާރު ޖަވާބުދާރީކުރުވުމުގެ ނިޒާމުތަކާ ބެހޭގޮތުންނާއި، މޫސުމީ ބަދަލުތަކަށް ހޭނުމުގެ މުހިންމުކަމާ ގުޅޭގޮތުން ގިނަ ރައްޔިތުންނަށް އެކަށީގެންވާ މައުލޫމާތު ލިބިފައި ނެތުމަކީ، މި ދާއިރާތަކުގައި އާންމުންގެ މާނަހުރި ބައިވެރިވުން ހަނިވާ ކަމެކެވެ.

އިސްލާހަށް ހުށަހެޅުނު ކަންކަން

ހިންގުމުގެ ނިޒާމުގައި ހުރި މި ގޮންޖެހުންތަކަށް ހައްލު ހޯދުމަށާއި މުޖުތަމައުގެ ކެތްތެރިކަން އިތުރުކުރުމަށް ކުރެވިދާނެ ކަންކަމާ ގުޅޭގޮތުން ޕެނަލިސްޓުން މަޝްވަރާކުރެއްވިއެވެ. މީގެ ތެރެއިން އެންމެ މުހިންމު އެއް ހައްލެއްގެ ގޮތުގައި ފާހަގަކުރެވުނީ ލާމަރުކަޒީ ހިންގުން ހަރުދަނާކޮށް، މާލީ ވަސީލަތްތަކާއި ގޮތް ނިންމުމުގެ ބާރު ރަށު ކައުންސިލްތަކަށް ފުޅާދާއިރާއެއްގައި ދިނުމެވެ. މިއީ ވަސީލަތްތައް އެންމެ އެދެވޭ ގޮތުގައި ބޭނުންކުރުމަށާއި މުޖުތަމައުގެ ބޭނުންތަކަށް އަމާޒުކޮށްގެން ކަންކަން ކުރުމަށް އޮތް އެންމެ މުހިންމު މަގުކަމުގައި ބެލެވުނެވެ.

ނާޒުކު ފަރާތްތަކުގެ ބައިވެރިވުން އިތުރުކުރުމަކީ އިސްލާހީ ބަދަލުތަކުގެ ތެރެއިން ފާހަގަކުރެވުނު އަނެއް މުހިންމު ކަމެވެ. ގޮތް ނިންމާ ފެންވަރުގައި ބާކީވެފައިވާ ފަރާތްތައް ތަމްސީލުކުރުން ކަށަވަރުކުރުމަށްޓަކައި، ސާފުކޮށް ބަޔާންކުރެވިފައިވާ އުސޫލުތަކެއް އޮތުމުގެ މުހިންމުކަން ޕެނަލިސްޓުން ފާހަގަކުރެއްވިއެވެ. މިގޮތުން އަވަށްޓެރި ސަރަހައްދުތަކުގައި އެންމެންގެ ބައިވެރިވުން ހިމެނޭ ކައުންސިލްތަކުން ވަޒީފާ ނެތް މީހުންގެ މައްސަލަތަކާއި ތައުލީމީ ފުރުސަތުތައް ފަދަ ކަންކަމުގައި ހޯދާފައިވާ ކާމިޔާބީތަކަށް އަލިއަޅުވާލައި، އެފަދަ ތަމްސީލުވުމުގެ ސަބަބުން ކުރާ ހެޔޮ އަސަރުތައް ދައްކުވައިދިނެވެ.

,

ވެރިކަންކުރާ އިދާރާތަކާއި އާންމު ރައްޔިތުންގެ މެދުގައި އޮތް ފަރަގު ކުޑަކުރުމަށްޓަކައި، އާންމުންގެ މަޝްވަރާ ހޯދުމުގެ ފުރުސަތުތައް އިތުރުކޮށް، އެކަން މިހާރަށްވުރެ ހަރުދަނާކުރުމަށް ބާރުއެޅުނެވެ. މިގޮތުން، ރަށު ފެންވަރުގެ ބައްދަލުވުންތަކާއި ޑިޖިޓަލް ވަސީލަތްތައް މެދުވެރިކޮށް ކުރިއަށްގެންދާ މަޝްވަރާތަކަކީ، ދެފަރާތުގެ މެދުގައި އިތުބާރު އުފައްދައި، ވެރިކަން ހިންގުމުގެ ނިޒާމުގެ ތެރެއިން މުޖުތަމައުގެ ބޭނުންތައް ފުއްދައިދިނުމަށް މަގުފަހިކޮށްދޭނެ ކަމެއްގެ ގޮތުގައި ފާހަގަކުރެވުނެވެ.

މީގެ އިތުރުން، ވަކި އަމާޒުތަކެއް ކަނޑައަޅައިގެން ހޭލުންތެރިކަން އިތުރުކުރުމުގެ މުހިންމުކަމުގެ މައްޗަށް އަލިއަޅުވާލެވުނެވެ. ވެރިކަން ހިންގުމުގައި ބޭނުންކުރާ ވަސީލަތްތަކާއި، ޒިންމާދާރުކުރުވުމުގެ ނިޒާމުތަކާއި، އަދި މޫސުމީ ބަދަލުތަކާ ގުޅޭގޮތުން އެޅޭ ފިޔަވަޅުތަކާ ބެހޭ މައުލޫމާތު ރައްޔިތުންނަށް ފޯރުކޮށްދީ ބާރުވެރިކުރުވުމަކީ، ހޭލުންތެރި އަދި ހަރަކާތްތެރި މުޖުތަމައެއް ބިނާކުރުމަށް ކޮންމެހެން ބޭނުންތެރި ކަމެކެވެ. މި މަގުސަދު ހާސިލުކުރުމަށްޓަކައި އަމަލީ ގޮތުން ކުރެވިދާނެ ކަންތައްތަކުގެ ތެރޭގައި، މުޖުތަމައު އިސްނަގައިގެން ހިންގާ ކެމްޕޭންތަކާއި ތައުލީމީ މަސައްކަތު ބައްދަލުވުންތައް ހިމެނޭކަމަށް ލަފާދެވުނެވެ.